Seite 22 - Valser Geschichten

Basic HTML-Version

22
Ds Tüüfelsch Blatta
Detta, wa jetz dia stotzend Halta bi ds Tüüfelsch Blatta ischt, ischt
früer es schöns, glatts Mattli gsi. Gchrat esoo schöns, wie uf Frunt
ussa bi de Hüüschera. Es het ou eim va Frunt gchört, dem ma dr Über-
nama dr Schwerrtoni agchecht het, wil är immer gfluochet hed as wia
en Türgg.
Wenn de äppa es frönds Tierli in schins Matt i gganga ischt, hed er das
Tierli in de Boda i verfluocht und schi sälber derzuo. Dernäbet ischt
är sus kchei schlächts Mannli gsi.
Amaal hed är duo es Gitzi, wa schi würd versprunga hä, in schim
Matt im lenga Gras i atroffa. Är het zeerscht asa böscha ggluogt und
de hed er agfanga fluocha: «Wenn nu dr Tüüfel das Matt esoo stot-
zend macha täti dass net emaal es Gitzi dri staa chönnti.» Mit denna
und andera leida Worta hed er das Tierli dr dür ichi, und zum Matt us
tschesst.
Wie duo beedi innets dem Matt schtöönt, het schi uf eimaal dr Bärg
erweigt, ds Matt het schi gchrümmt und träät, wia ne Daara, we ma
Luft dri blaast. Es ischt stotzender und stotzender cho, schier wia dia
Felsa, wa una dra in d Teufi gäänt. Dr Toni ischt mächtig erchlüpft,
het ggluogt und ggluogt, het gwartet und gwartet, und wie är naa len-
gam Bsinna het wella hei, hed er nümma dür die gruusigi Stötzendi
ussa törfa. Är het duo probiert, das Gitzi, wa immer näbet im gsch-
tanda ischt und vor Angst zittaret het, uber die stotzend Halta us z
triba. Aber es het um alli Wäält net wella folga und hätti schi ender la
erschlaa, as van em z ga. D Gitzi machens halt esia esoo, ma chascha
net vertrieba, es sind eifach stettigi Tierli.
Das Gitzi ischt aber es bsunders, kcharjoses Tierli gsi, de uf eimal
hets agfanga reda. «Ich tarf da nit gaa, aber wenn ier mich uf dr
Aggsla uber die stotzend Halta us träget bis uf Frunt, so machi, dass
euws Mattli birum glatts chunt wia s dervor gsi ischt.» Esoo heds
gseit, und das Mannli weelidig a ggluogt.
Das Mannli ischt uber dia Red aab erchlüpft. Esoo es Gitzi, eis
wa de no reda chan, hed äs de doch no nia atroffa. Äs het das Gitzi
aggluogt, de hed s dür die stotzend Sitta aab gluogt, weder an das
schöna Mattli denkt, und de weder uf ds Gitzi ggluogt. Aber was