Seite 33 - Valser Geschichten

Basic HTML-Version

33
schi no gchrat fri es Wiili bim Nuschi uf am Ofa uuf verwiilat. Schi
beedi wärda halt mid enandera ghengerat hä, de vam ena groba, leida
Lümmel ischt emaal gchei Red mee gsi.
Wa dr Hannes vam Ofa acha cho ischt, het na dr Vatter gfräägt,
wie lang äppa die Meigga uf dem Ofa uuf pliiba müessi? Är hätti scha
mächtig nötig. Äppa in drii Wucha, het dr Dokter gmeint, wärdi der
Bruch woll gnäsa si, är well gära fliissig naaluoga, dass es gschwinter
gängi.
Am andera Tagg ischt dr Hannes birum da gsi und e ganzi Wiil bim
Nuschi uf em Ofa gchockt. Ei Tagg na em andera, Sunntig wie Wärtig,
ischt er cho ge naa luoga. Es ischt im halt mächtig dra ggläga gsi, dass
die Sach rächt fürra chömmi. Und jedesmal ischt dr Hannes länger uf
em Ofa dobna pliba, ooni gchrat vil am Bei z macha.